Ешкімге тәуелсіз, егеменді ел болғанымызға биыл 30 жыл. 30 жыл – айтуға оңай болғанымен, тарих үшін ауыз толтырып айтарлықтай уақыт. Осы жыл­дар аралығында мемлекет тарихында елеулі өзгерістер орын алды.

Қазақстан – әлем елдеріне өзінің дер­бес, дара мемлекет екендігін дәлелдей алды. Бүгінде еліміз шекарасы шеген­делген, бай салт-дәстүрі бар, мәдениеті озық, діні мен тілі, ұлттық құндылықтары бай елдер қатарында.

Ғасырлар бойы азаттық аңсаған бабалардың жолы азапты, тағдыры ауыр болғаны анық. Талай зорлық, зобалаңды, алапат қырғынды бастан кешірді. Сонда да ұлт ретінде сақталып, бірлігі берік ел күйінде қала білді. Ең бас-тысы, халқымыздың еркіндікті аңсаған тәуелсіздік рухы мықты еді.

Тәуелсіздік – еліміздің баға жетпес байлығы. Тәуелсіздік – қастерлі ұғымның бірі. «Тәуелсіздік – қайта жаңғырған қазақ мемлекеттігінің, ата-бабаларымыз аңсаған азаттықтың тұғыры нығая түскенін әйгілейтін маңызды белес. 30 жыл көптеген халықтар үшін қиындығы мен қуанышы, дағдарысы мен дамуы алмасқан тұтас дәуір деуге болады. Сондай-ақ тәуелсіз ел болу оны жария­лаумен немесе мемлекеттің іргетасын қалаумен шектелмейді. Тәуелсіздік үшін нағыз күрес күнделікті еңбекпен, үздіксіз әрі дәйекті елдік саясатпен мәңгі жалғасады. Біз қуатты тәуелсіз

мемлекетімізбен ғана ұлт ретінде жер бетінде сақталамыз. Осы айнымас ақиқатты берік ұстануымыз қажет. «Тәуелсіздік бәрінен қымбат!» деген бір ауыз сөз мәңгі ұранымыз болуға тиіс»,-деп еліміздің Президенті Қасым-Жомарт Тоқаев «Тәуелсіздік бәрінен қымбат» атты мақаласында

айтқан болатын. Айтса айтқандай, қазақ халқы осынау ұлан-байтақ жерін ешкімнен қол жайып сұрап алмады, ешкімнен тар­тып та алған жоқ, жалға да жалбарынып өтінбеді. Тәуелсіздік бізге бабалардан қалған ұлы құндылық. Осы құндылықты бабаларымыз ақ білектің күшімен, ақ найзаның ұшымен соңғы қасық қаны қалғанша қорғап қалды. Ұрпаққа аманат етті. Шындығында халық даналығында «Тәубенің зоры – тәуелсіздік» деген қанатты сөз бар. Ата-бабаларымыздың аңсаған арманы – тәуелсіздіктің бесігінде тербеліп, еркін өмір сүріп жатқан біздер шынайы бақытты жандармыз. Ендігі мақсат — осы еркіндікті, егемендікті баян­ды ету жолында аянбай тер төгіп, жұмыла еңбек ету.

«Қазақстан» егеменді ел болып, дүниежүзіне танылды. 120-дан аса ұлт өкілдері тұратын осынау қасиетті ме­кенде, асқақтаған өлкеде, кеңшілігі керемет дархан дастархандай дала­да, егіні теңіздей толқыған, төрт түлігі өрбіген, өндірісі өркендеген мекенде өмір сүруші әрбір адам өз Отанын жанындай сүйіп, оның көк байрағын көкке көтеруді мақтаныш тұтады.

Тәуелсіздік — ең басты құндылығымыз. Тәуелсіздікке қантөгіссіз, бейбіт түрде қол жеткізгеннен кейін ғана елімізді әлемнің өркениетті мемлекеттерінің қатарына қоса алдық. 30 жыл ішінде тәуелсіз Қазақ елін қалыптастырып, нарықтың қиын өткелектерінен аман өткізіп келеміз. Осы кезеңде Қазақстанды дүние дидарындағы ең мықты мемлекеттер танитындай, сый­лайтындай деңгейге жеткізген Тұңғыш Нұрсұлтан Назарбаевтай көреген саясаткердің ерен еңбегін дәл бүгін және әрқашанда айтып өтеміз.

Кенжегүл РАЗБАЕВА,

«Қаракемер орта мектебі, мектепке дейінгі шағын орталығымен» КММ-нің әлеуметтік педагогы.