Қазақ киносының саңлағы, жерлесіміз, Абай рөлін нақышына келтіріп сомдаған дарынды актер, тума талант иесі – Болат Мәзімбайұлы Әбділмановтың Қаракөз ауылындағы орта мектепті бітіргеніне биыл 45 жыл толады екен. 25 мамырда мектепте өтетін «Соңғы қоңырау» шарасына бірге оқыған қазіргі тілмен айтсақ сыныптастарымен бірге 45 жылдық кездесуге келеді.
Жерлесімізді баска жұрт құрметтеп жатқанда біздің үндемей жатқанымыз шынымен де ұят болар, Ілияс атамыз айтқандай «Өз елі ескермесе өз ерлерін, ел тегі алсын қайдан кемеңгерін»,-дегендей осы мерекеде Кенғарын ауылындағы мектептен Болат Әбділмановқа арналған кабинет ашылғалы жатыр екен…
Бұл да бір қуанышты сәт.
Осыдан 45 жыл бұрын 1977 жылы Қаракөз ауылындағы орта мектепті бітірген жылы аудандық «Өмір нұры» газетіне «Соңғы қоңырау» деген өлеңім шығып еді – дейді дарынды актер. Осы мақаланы жазарда менің Болат ағамызбен ұқсастығымды байқадым. Менің де «Өмір нұры» газетіне ең алғаш шыққан өлеңім «Соңғы қоңырау» болатын:
Ғарыштағы арманды,
Қол созым жерге ту етіп.
Қоңырау соңғы соғылды –
Мектептің алды ду етіп – деп басталатын. Сосын тағы бір алғашқы өлеңім бар:
Алтын ұям мектебім,
Өзіңде өстім, көктедім.
Тоғыз жыл бойы уақыттың,
Білмеппін қалай өткенін.
Енді Болат ағамыздың өлеңіне назар аударайық:
Асқар биік алтын ұя мектебім,
Өзіңде өтті небір ерке көктемім.
Алдым білім он жыл оқып саяңда,
Енді міне аштым өмір беттерін – дейді. Иә, мектептен алған біліммен, соңғы қоңырау үнімен өмірдің жаңа беттерін ашады. Ары қарай:
Есімде алғаш күміс қоңырау сыңғыры,
Ұласты оған соңғы қоңырау мұңды үні.
Ұстаздармен қоштасамыз соңғы рет,
Алда өмір асқаралы, дүбірлі – деп қорытындылайды. Өмірдің жаңа беттерін ашып, асқаралы дүбіріне дүбір қосып, болашаққа жол тартқан ағамыз, осындай беделді азамат боларын сол кезде білгендей.
Ақсу ауданы қаншама дарындардың киелі мекені, Ілияс атамыз Қазақтың үш арысының бірі. Осы Ақсудың топырағынан нәр алған Болат ағамызда Республикамызға, тіпті шет елдерге танымал актер, тума талант. Сондықтан ағамыз туралы әңгімемізді Республикалық Ілияс оқуларымен қатар салып отырмыз.
Болат ағамыз 1960 жылы 12 қарашада Алматы облысы, Ақсу ауданы, «Кеңқарын» ауылында дүниеге келген. 1977 жылы Қарагөз ауылының «Қызылорақ» орта мектебінде 10 – жылдық мектепті бітірген. 1978 – 1982 жж Т.Жүргенов атындағы өнер академиясын бітірген.1982 – 1984 жылдары Совет армиясы қатарында Отан алдындағы борышын өтеген. 1984 жылдан бастап Ғ.Мүсірепов атындағы жастар театрында қызмет жасап, Театрдағы қызметі барысында актерлік шығармашылығын шыңдап, шеберлігімен көзге түсті. 1993 жылдан бастап М.Әуезов атындағы Ұлттық театрдың актері.
30 жылда кино саласына сіңірген еңбегі үшін «30 жылға 30 есім» атты Ұлттық жобаның жеңімпазы Тәуелсіздік тарландарының бірі, нағыз Тәуелсіздік тұлғасы. «Құлагер» сыйлығының, «Құрмет» және «Парасат» ордендерінің иегері, «Қазақстанның еңбек сіңірген қайраткері», Елбасы Нұрсұлтан Назарбаевтың, Президентіміз Қасым – Жомарт Тоқаевтың «Алғыс хаттарымен» марапатталған, Тәуелсіздікке 10 жыл, 20 жыл, 25 жыл медальдарының иегері. «Жерұйық» фильміндегі Орынбай рөлі үшін «Жылдың ең үздік киноактері» және Абай рөлі үшін «Театрдың ең үздік актері» номинациясын жеңіп алған. (2001 – 2020 жылдар) Өз мамандығының хас шебері ретінде Болат Мәзімбайұлы Әбділманов ағамыз өз кейіпкерлерін сомдағанда оның ішкі дүниесін ашуға тырысты.
Театрда 100-ге тарта, кинода 100-ден аса рольдер ойнаған, оның ішінде Одақтың және шетелдік кинолар бар. Абай, Сұлтанмахмұт, Мұқағали, Пет-ручио, Фрунзе, Сталин, Лизандр, Жошы хан, Арыстан, Қодар, Қожажас мерген, Адам Ата, Баймағамбет, Орынбай, Жанбай, Бөгенбай, Ералы т.б рөлдерді сомдаған. Ілиястың 100 жылдығында «Ілияс», Абайдың 150 жылдығында «Абай», Жамбылдың 150 жылдығында «Жамбыл», М.Әуезовтың 100 жылдағында «М.Әуезов», Сәтбаев мерейтойында «Сәтбаев», Тәуелсіздіктің 10 жылдығында «Абылайхан» рөлдерін сомдаған және тағы басқа да мерейтойларда атсалысқан. 2021 жылы «Абайдың 175 жылдығына» арнап, «Алаш» әдеби сый иегері Мадина Омаровамен бірігіп «Абайдың жұмбағы» атты пьеса жазған. Сол пьесадағы Абай рөлі үшін «Қарашаңырақ» фестивалінде «Ең үздік актер» номинациясын жеңіп алған. 5 баланың әкесі. Ұлы Иманғали Мәзімбаев әке жолын қуған актер. «Аңшы бала», «Махамбет», «Балтакөлде бақытым», «Қазақ хандығы», «Туған жер», «Ақжауын», «Бақытсыздар бағы» сияқты басқа да фильмдерге түскен. Басқа балалары әр саланың жоғарғы білімді азаматтары.
Үржар қаласының атын Қаракерей Қабанбай атына ауыстыру туралы мәселені көтеріп, ел ағалары мен тарихшылар басын қосып жиындар өткізуші бастамашы белсенділердің бірі…
Болат ағамыз мереке қарсаңында білім нәрімен сусындаған өскелең ұрпаққа Жаңа Қазақстанның жаңаруы үшін, соның кірпіші болып қаланатын әрбір білімді, намысты, саналы түлекке ақ жол тілеп, Тәуелсіздігіміз тұғырлы, мемлекетіміз ғұмырлы болсын. Күніміз шуақты болсын, Қазақстанымыз қуатты болсын деген тілегін білдіреді.
Ербол СЫМХАНОВ,