«Туған жерге туыңды тік!» акциясы аясында Сарқан ауданының құрметті азаматтарының басқосуы ұйымдастырылып, оған біздің ауданнан зейнеткерлер Орал Сердалықызы Исанова мен Әшімғали Құсайынұлы Жұмагелдиндер қатысып қайтты.

Е.Сиқымов атындағы орта мектептің мұғалімі Сәкен Рафиков жаттықтыратын ауданның волейболшы қыздар командасы 8 – 10 ақпан аралығында Қаскелең қаласында өткен облыстық жарысқа қатысып, үздік бестікке енді.

Волейболшы қыздар арасында мектепаралық жарыс өтіп, оған ауданның білім ошақтарынан 22 команда қатысты. Қызықты тартыста Е.Сиқымов атындағы орта мектеп 1-ші, Ж.Сыдықов 2-ші, М.Мәметова мектебі 3-ші орындарды жеңіп алды.

Дін істері жөніндегі облыстық басқарманың ұсынысы бойынша адамдардың діни сауаттылығын арттыру бағытында бірқатар нәтижелі жұмыстар жүргізілуде. Соған сәйкес жақында аудандық діни АНТ мүшелері аттестациядан өткізілді.

Төтенше жағдай жөніндегі қызметкерлер ауа – райы деректеріне сүйеніп, ақпанның 2-ші жартысында қалың қар жауатынын айта келе ауыл әкімдерінен Ақсу, Бүйен, Қапал өзендерінде көктемде су мөлшері көбейетіні жайында тұрғындарды ескертуді сұрады.

Аудан әкімдігінің аппарат мәжілісінде көктемгі су тасқыны, сел қаупінің алдын алу, су бөгендерінің жұмысы туралы аудандық төтенше жағдайлар комитеті мен Ақсу, Қапал, Матай аймақтарының жауапты қызметкерлері хабарлама жасады.

Былтыр жекеменшік және мемлекеттік әріптестік бойынша «Арай» балабақшасы салынып жұмыс істесе, биыл да бұл игі жұмыс жалғастырылып Тәуелсіздік көшесінің бойында 1 жекеменшік балабақша құрылысы бас-талды.

Қабанбай батыр көшесіндегі өртеніп кеткен көп пәтерлі үйдің 14 отбасына жаңадан баспана салып беру қолға алынып, өтпелі жылдың сәуір айында пайдалануға беріледі деп күтілуде. Оны облыс әкімдігі өз бақылауына алып отыр.

Алдағы жылдары аудандық денсаулық сақтау саласының материалдық- техникалық базасын жақсарту мақсатында Жаңалық, Кеңғарын, Алтынарық сияқты ауылдарда тозған ФАП- тардың орнына жаңа ғимараттар салу көзделуде

Биыл Бижарас Садырбаев атындағы, Тарас мектептерінің құрылысы басталды. Келер 3 жылдың ішінде Көшкентал, Көлтабан ауылдарында жаңадан мектеп салу жоспарланса, Мамания сияқты 6 мектеп күрделі жөндеуден өтпек.